Ritmennskunámskeið - að skrifa sig frá erfiðum tilfinningum

1.-3. september 2017 - Námskeiði er lokið

Helgarnámskeið frá föstudegi til sunnudags, Steinunn Sigurðardóttir rithöfundur leiðir þátttakendur í að losa sig frá erfiðum tilfinningum með skapandi skriflegri tjáningu.

Unnið verður með texta sem þátttakendur skrifa á meðan dvölinni stendur. Einnig verður unnið með texta eftir aðra höfunda. Ætlunin er að nálgast skapandi skriflega lýsingu á vanlíðan og depurð og reynt verður að skoða þessa líðan utanfrá með textann sem kíki.

Hópeflið og ritmennsku-aðferðin eru notuð sem tæki til þess að stuðla að bættri líðan og skapa uppbyggjandi kraft fyrir þá sem glíma við óyndi, áhyggjur, kvíða o.fl.

Fyrir fyrsta tíma hafa þátttakendur valið sér sér eitt uppáhalds sorgarljóð (eða þjáningarljóð) sem síðan er unnið með. Einnig mega þátttakendur hafa tilbúinn stuttan texta af þeim toga fyrir fyrsta tíma.  Fyrri hluta námskeiðs er dvalið við skugga, en ferðinni er heitið í áttina að ljósi og léttleika. Námskeiðið hefur mælst mjög vel fyrir og síðast komust færri að en vildu.

 

Steinunn Sigurðardóttir sendi frá sér ljóðabókina Sífellur þegar hún var 19 ára.  Hún hefur síðan þá sent frá sér ljóð og skáldsögur jöfnum höndum, þar á meðal Tímaþjófinn, Hjartastað og JóJó.  Nýjustu bækur hennar, frá haustinu 2016, eru Heiða-fjalldalabóndinn og Af ljóði ertu komin.  Fjölmargar skáldsögur hennar hafa komið út í erlendum þýðingum, einkum á þýsku, ensku, frönsku og Norðurlandamálum.

Steinunn lauk háskólaprófi í sálarfræði og heimspeki frá University College Dublin. Hún var lengi fréttamaður útvarps.  Hún samdi bók um Vigdísi Finnbogadóttur meðan hún var í embætti.  Hún hefur skrifað greinar í blöð og tímarit og tekið sjónvarpsviðtöl við rithöfunda, svo sem Halldór Laxness og Guðberg Bergsson.

Steinunn býr nú í Strassbourg þar sem hún kennir skapandi skrif við háskólann.

Á námskeiðinu er innifalið: Gisting í tvær nætur, ljúffengur og hollur matur, aðgangur að sundlaugum, baðhúsinu Kjarnalundi og líkamsrækt, hóptímar, fræðsla og slökun.

Verð. 59.000.

Skráning This email address is being protected from spambots. You need JavaScript enabled to view it. eða í síma 483 0300.