Heilsufæði á Heilsustofnun

Boðið er upp á hágæða heilsufæði á Heilsustofnun. Sérstök áhersla er lögð á grófmeti úr jurtaríkinu eins og til dæmis baunir, hýðishrísgrjón, ýmis konar heil korn og svo auðvitað grænmeti og ávexti. Fæðið inniheldur einnig egg og mjólkurvörur. Leitast við að nota eins lítið af salti, harðri fitu og sykri eins og mögulegt er.

Það er stefna Heilsustofnunar að hafa sem minnst af unnum matvælum, við veljum okkar hráefni mjög vandlega og allur matur er eldaður frá grunni á staðnum.

Brauðið er bakað á staðnum og er 100 % heilhveiti. Hluti af grænmetinu og öðrum matjurtum sem boðið er upp á er lífrænt ræktað í eigin gróðurhúsum. Gróðurhúsin og allt landsvæði Heilsustofnunar er yfirlýst svæði án erfðabreyttra lífvera.

Kjöt er ekki á matseðlinum en boðið er upp á fiskrétt tvisvar í viku og mikið framboð er af mjólkurvörum. Ekki er boðið upp á kaffi en þess í stað er boðið upp á  venjulegt te og te hússins sem er gert úr þekktum íslenskum lækningajurtum.

Litið er  á matinn sem hluta af fræðslu og meðferð gestanna. Þeir sem þurfa að létta sig fá fræðslu um rétta skammtastærð, einnig er boðið upp á orkubætt fæði og næringardrykki fyir þá gesti sem á því þurfa að halda. Þeir sem þurfa á sérfæði að halda fá ráðgjöf hjá næringarráðgjafa. Reglulega er boðið upp á sýnikennslu í gerð grænmetisrétta sem matreiðslumeistari sér um.

Fjölbreytni í mataræði
Áhersla er lögð á fjölbreytni í fæðuvali. Sérstök áhersla er lögð á grænmeti og ávexti, fisk, fituskertar mjólkurvörur, gróf brauð og annan kornmat og  vatn til drykkjar.

Miðað er við að fæðið innihaldi

  • A.m.k. 500 grömm af grænmeti og ávöxtum á dag þar af a.m.k. 200g af grænmeti og 200g af ávöxtum, auk kartaflna.
  • Fiskmáltíð tvisvar í viku, fyrir utan álegg eða salöt úr fiski.
  • Tvo skammta af mjólkurmat á dag, fitulitlar og ósykraðar vörur. Ostur getur komið í stað mjólkurvara að hluta til.
  • Fitu og feitar matvörur í hófi. Matarolía eða önnur mjúk fita er notuð við matargerð.
  • Auk þess er lýsi í boði og gott aðgengi að drykkjarvatni.

Sérstaða Heilsustofnunnar 

  • Boðið er upp á heilsufæði alla daga. Litið er á matinn sem þátt í fræðslu og meðferð.
  • Það er stefna Heilsustofnunnar að matur sé matreiddur frá grunni á staðnum og áhersla er lögð á að velja hráefni vandlega út frá ferskleika, gæðum og sem mest án aukaefna.
  • Sérstök áhersla er lögð á grófmeti úr jurtaríkinu, til dæmis baunir, hýðishrísgrjón, ýmis konar heilt korn, grófmalað mjöl ásamt grænmeti og ávöxtum.
  • Alla daga er í boði sykurlaust meðlæti í tetíma.
  • Grænmeti, kryddjurtir og annað sem ræktað er á staðnum er lífrænt ræktað. Við innkaup á matvælum er lögð áhersla á að velja íslenska framleiðslu.
  • Kjöt er ekki á matseðli.
  • Boðið er upp á te í úrvali m.a. te hússins sem er gert úr  lækningajurtum, sem tíndar eru af starfsmönnum stofnunarinnar í íslenskri náttúru. Ekki er boðið upp á kaffi.

Við fáum reglulega reynslusögur frá gestum okkar og hér getur þú séð hvað þeir segja um dvöl sína á Heilsustofnun.

Skoða ummæli