Þunglyndi
Í fyrirlestrinum er fjallað um staðreyndir um þunglyndi, rætt er um einkenni þunglyndis, hvers vegna við verðum þunglynd, þær meðferðarleiðir sem hafa gefist vel við þunglyndi og hvað við getum gert til að fyrirbyggja að við verðum þunglynd.
Kvíði
Í fyrirlestrinum er fjallað um kenningar um kvíða, rætt er um einkenni, hvers vegna okkur hættir til að verða kvíðin og þær meðferðarleiðir sem hafa gefist vel við kvíða.
Fyrirlestrar eru haldnir mánudaga, miðvikudaga og föstudaga kl. 10:00
Í fyrirlestrinum um Heilsusamlegt mataræði er fjallað um mat, máltíðir og innkaup sem stuðla að bættri líðan og betri heilsu. Einnig er rætt um ýmsar staðhæfingar og rangfærslur um mat og fæðubótarefni sem birtast almenningi reglulega.
Á síðustu árum hefur athygli vestrænna vísindamanna beinst að því hvernig fornar hugleiðsluaðferðir geta nýst okkur í daglegu lífi og hjálpað okkur að finna kyrrð innra með okkur og í framhaldi átt auðveldara með að fást við þá streitu og erfiðleika sem lífið leggur óhjákvæmilega á okkur.
Bráðskemmtilegur fyrirlestur um hvernig bæta má heilsuna og auka lífsgæðin með hjálp húmors. Á fyrirlestrinum eru ýmis sýnishorn af húmor, mismunandi tegundir og mörg spaugileg dæmi um hvernig nota ber húmor í daglega lífinu.
Gildi þjálfunar: Fjallað er um áhrif þjálfunar á líkamlega og andlega heilsu og gefnar ráðleggingar um hvernig hægt er að halda áfram þjálfun heima. Hvað þarf að gera mikið? Hvaða þjálfun hentar best?
Góður lífsstíll alltaf: Fjallað er um mikilvægi þess að halda áfram að vinna að góðum lífsvenjum eftir að heim er komið. Hvernig hægt er að breyta lífsvenjum í skrefum og til frambúðar, ekki bara tímabundið. Markmiðssetningar og stuðningur.
Beinþynning: Í fyrirlestrinum verður svarað spurningunni hvað er beinþynning? Fjallað um áhættuþætti beinþynningar og fyrirbyggjandi aðgerðir.
Gott minni gulli betra: Fyrirlesturinn fjallar um skilgreiningu á minni, minnisstöðvar, mismunandi minni og mikilvægi minnisþjálfunar. Upphaf skipulagðar minnisþjálfunar og ekki síst nokkur góð ráð til að skerpa minnið.
Þetta er námskeið til að læra það sem á ensku heitir „Compassion Focused Therapy“. Compassion er hugtak sem erfitt er að þýða á íslensku, orðin samkennd og mannúð ná því að einhverju leyti, en hafa ber í huga að compassion er einnig hægt að beina að manni sjálfrum, þ.e. að sýna sjálfum sér samkennd andspænis erfiðum tilfinningum og of mikilli sjálfsgagnrýni.
Kjarninn í samkennd felur í sér bæði góðvild og hugrekki til að nálgast þá hluti sem hræða okkur eða okkur finnast óþægilegir.
Samkenndarmiðuð meðferð er ung meðferðarleið sem sálfræðingurinn og prófessorinn Paul Gilbert í Bretlandi hefur lagt fram og þróað. Hún byggir á mörgum grunnstoðum m.a. á þekkingu okkar á því hvernig maðurinn hefur þróast í gegnum aldirnar, þekkingu á taugasálfræði og hvernig heili okkar vinnur. Þarna er gamalli austrænni visku blandað saman við nýja klíníska sálfræði, þróunar-og þroskasálfræði.
Streituþol: Fjallað er um streitu sem eðlileg viðbrögð einstaklingsins við áreiti, á hvaða hátt langvinn streita getur komið niður á heilsu og vellíðan. Bent á leiðir til að nýta eðlileg streituviðbrögð til uppbyggingar og hvernig má takast á við langvinna streitu.
Svefn - eðli svefns: Um eðli svefns, hvað stjórnar svefninum, svefnmunstur o.fl.
Svefntruflanir: Um orsakir svefntruflana og mögulegar leiðir til úrbóta.
Úrræði við svefnvandamálum. Um mismunandi úrræði vegna svefnvandamála.
Svefn - draumar og martraðir: Um söguna sem draumarnir segja t.d í þunglyndi og hvernig breytingar á sögunni geta breytt líðan.
